မြန်မာ့စီးပွားရေး စောင့်ကြည့်လေ့လာမှု - မရေရာမှုများဆီသို့ ဦးတည်သွားလာခြင်း_ဇန်နဝါရီ၊ ၂၀၂၃ ခုနှစ်

မြန်မာ့စီးပွားရေးသည် ပြီးခဲ့သည့်ခြောက်လတာအတွင်း မတည်ငြိမ်မှုဒဏ်ကို သိသိသာသာ ရင်ဆိုင်နေရဆဲဖြစ်သည်။ လူမှုဘဝများနှင့် သက်မွေးဝမ်းကျောင်းလုပ်ငန်းများအပေါ် ထိခိုက်စေပြီး ကာလကြာရှည်ဖြစ်ပွားနေသည့် ပဋိပက္ခများနှင့် လျှပ်စစ်ဓာတ်အားပြတ်တောက်ခြင်းများက စီးပွားရေးလုပ်ငန်းများကို ဆက်လက်အဟန့်အတားဖြစ်စေသည်။ ၂၀၂၂ ခုနှစ်၊ မတ်လအထိ ခြောက်လတာကာလအတွင်း ဘဏ္ဍာရေးလိုငွေ လျော့နည်းသွားခဲ့သော်လည်း ပြည်သူ့ကြွေးမြီမှာ GDP ၏ ၆၀ ရာခိုင်နှုန်းအထက်ထိ မြင့်တက်သွားမည်ဟု ခန့်မှန်းသည်။ ခက်ခဲလှသည့် စီးပွားရေးအခြေအနေများကြောင့် အိမ်ထောင်စုစားဝတ်နေရးကို များစွာထိခိုက်စေပြီး ထိခိုက်အားနည်းလွယ်မှုကို ပိုမိုဆိုးရွားစေလိမ့်မည်။ ကုန်ထုတ်လုပ်မှုသည် ၂၀၁၉ ခုနှစ်ရှိအဆင့်ထက် များစွာနိမ့်ကျနေဦးမည်ဖြစ်သော်လည်း ၂၀၂၃ ခုနှစ်၊ စက်တင်ဘာလတွင် ကုန်ဆုံးမည့်ဘဏ္ဍာနှစ်၌ GDP သည် ၃ ရာခိုင်နှုန်းခန့် တိုးလာနိုင်သည်ဟု ခန့်မှန်းသည်။ မြန်မာနိုင်ငံ၏ အားလုံးပါဝင်နိုင်သည့် ကာလရှည် တိုးတက်ဖြစ်ထွန်းနိုင်မှုအလားအလာသည် လွန်ခဲ့သည့် နှစ်နှစ်အတွင်း သိသိသာသာ ထိခိုက်သွားခဲ့သည်။ လျှပ်စစ်ဓာတ်အားပြတ်တောက်မှု၊ သယ်ယူပို့ဆောင်ရေးအခက်အခဲများ၊ ကုန်သွယ်မှုနှင့် နိုင်ငံခြားငွေလဲလှယ်မှုအတားအဆီးများ၊ စည်းမျဉ်းစည်းကမ်းဆိုင်ရာမရေရာမှု စသည်တို့ဆက်လက်တည်ရှိနေသောကြောင့် စီးပွားရေးအခင်းအကျင်းသည် တိုးတက်ကောင်းမွန်ရန် နှောင့်နှေးနေမည်။ မူဝါဒနှင့်နိုင်ငံရေးအခင်းအကျင်း၏ လတ်တလောပြောင်းလဲမှုများကြောင့် တိုးတက်မှုမြင်ရဖွယ်ရှိသော်လည်း၊ ရင်းမြစ်များအား ထုတ်လုပ်မှုနှင့်ယှဉ်ပြိုင်မှုအားကောင်းစေမည့်နယ်ပယ်များတွင် ခွဲဝေသုံးစွဲမှုမရှိခြင်းကြောင့် ရေရှည်တွင် ဒုက္ခရောက်နိုင်သည်။ နိုင်ငံခြားငွေလဲလှယ်မှုဆိုင်ရာ မူဝါဒသည် စီးပွားရေးထိခိုက်မှုများအား လျှော့ချရမည့်အစား မည်သို့ပိုမိုဆိုးရွားစေနိုင်ကြောင်း သာဓကကို ဤအစီရင်ခံစာက ဖော်ပြထားသည်။