အင်းလေးကန်နယ်မြေခရီးစဉ်/ ခရီးသွားလုပ်ငန်း စီမံခန့်ခွဲရေးအစီအစဉ် - (၂၀၁၄ - ၂၀၁၉)

အင်းလေးကန်နယ်မြေ ခရီးစဉ်/ ခရီးသွားလုပ်ငန်း စီမံခန့်ခွဲရေးအစီအစဉ် (DMP) သည် မြောက်ဘက် ဓနုတိုင်းရင်းသား ကိုယ်ပိုင်အုပ်ချုပ်ခွင့်ရဒေသ ရဝမ်ဂန် မြို့နယ်မှသည် တောင်ဘက် လှိုင်ကော်မြို့အထိ၊ အနောက်ဘက် ကလောမြို့မှသည် အရှေ့ဘက် ပအို့တိုင်းရင်းသား ကိုယ်ပိုင်အုပ်ချုပ်ခွင့်ရဒေသ ဟိုပုန်း မြို့နယ်အထိ ဒေသတစ်နံတစ်လျားရှိ အကျိုးစီးပွါးပတ်သက်ပါဝင်သူများ၏ ကျယ်ကျယ်ပြန့်ပြန့် ညှိနိုင်း အကြံပြုဆွေးနွေးမှုများ၊ လူတွေ့မေးမြန်းမှုများ၊ အဓိကသက်ဆိုင်သည့် အစုအဖွဲ့များနှင့် တွေ့ဆုံဆွေး မှုများ၊ အလုပ်ရုံဆွေးနွေးပွဲများနှင့် သက်ဆိုင်ရာ ကျွမ်းကျင်ပညာရှင်များ၏ စိစစ်ဝေဖန် အကြံပြုမှုများမှ တစ်ဆင့်ပေါ်ပေါက်လာသည့် ရလာဒ်တစ်ခုဖြစ်ပါသည်။ အထက်ဖော်ပြပါ နယ်မြေဒေသတစ်ခုလုံးသည် အကျယ်အဝန်းအားဖြင့် ၁၉, ၀၀၀ စတုရန်းကီလိုမီတာ (၇, ၃၄၀ စတုရန်းမိုင်) ကျယ်ဝန်း၍ လူဦးရေ (၁.၄) သန်းခန့် မှီတင်းနေထိုင်လျက်ရှိပါသည်။

ဤ (DMP) လေ့လာမှု အစီရင်ခံစာမှ မြန်မာနိုင်ငံ၏လက်ရှိ ခရီးသွားလုပ်ငန်း အခြေအနေ၊ အလား အလာများကို အင်းလေးကန်နယ်မြေ ဒေသနှင့် ချိတ်ဆက်၍စိစစ်သုံးသပ်ထားပြီး သဘာဝပတ်ဝန်းကျင် ဆိုင်ရာ ကိစ္စရပ်များ၊ ရေရှည်တည်တံ့ခိုင်မြဲမည့် ခရီးသွားလုပ်ငန်းနှင့် ခရီးသွားဧည့်သည်များကို ဆွဲဆောင် နိုင်မည့် စီးပွါးရေးလုပ်ငန်းများ ဖွံ့ဖြိုးတိုးတက်လာစေရေးမဟာဗျူဟာဦးတည်ချက်၊ နှင့် ကမ္ဘာ့အဆင့် ခရီးစဉ်/ခရီးသွားလုပ်ငန်းတစ်ခု ပေါ်ထွန်းလာစေရန် ပဓာနကျသည့်အချက်များကို ဖော်ထုတ် တင်ပြ ထားပါသည်။ ဤဒေသသည် အလှုရှင်များနှင့် အစိုးရ၊ ပုဂ္ဂလိကကဏ္ဏ ဖွံ့ဖြိုးတိုးတက်ရေး ရန်ပုံငွေ စီမံကိန်းများ အာရုံစိုက်သည့် နယ်မြေတစ်ခု အမှန်တစ်ကယ် ဖြစ်လာပါလိမ့်မည်။

ဒေသခံလူမှုအဖွဲ့အစည်းများ၊ စီးပွါးရေးလုပ်ငန်းများ၊ အစိုးရတာဝန်ရှိသူများ၊ ရပ်ရွာဒေသအဖွဲ့ အစည်း များ၏ လိုလားချက်များနှင့် သဘာဝပတ်ဝန်းကျင်ဆိုင်ရာလိုအပ်ချက်များ၊ လေ့လာတွေ့ရှိ သုတေသန ပြုမှုများအပေါ် အခြေပြု၍ ရေးဆွဲထားသည့် ဤ (DMP) စာတမ်းအစီရင်ခံစာသည် ရန်ပုံငွေထောက်ပံ့မှု လုပ်ငန်းစဉ်များအတွက် မူဘောင်တစ်ခုအဖြစ် ပံ့ပိုးပေးထားပါသည်။ အရေးကြီးဆုံးသောအချက်မှာ အင်းလေးကန်ဒေသရှိ ပြည်သူများအနေဖြင့် ၎င်းတို့၏ဇာတိမြေတွင် ခရီးသွားလုပ်ငန်းများဖွံ့ဖြိုးတိုးတက်အောင်ဆောင်ရွက်ရာ၌ ၎င်းတို့၏ လိုလားချက်များ၊ လိုအပ်ချက်များ ကို ပွင့်လင်းစွာဖော်ပြဆွေးနွေးနိုင်စေရန်၊ တစ်ချိန်တည်းမှာပင် ၎င်းတို့၏ နယ်မြေဒေသကို သွားလာ လည်ပတ်၊ နေထိုင်၊ အခြေချ၊ အလုပ်လုပ်ကိုင်ရန် ကောင်းမွန်သင့်လျော်သည့် ခရီးသွားလုပ်ငန်း ရေရှည် ဖွံ့ဖြိုးတိုးတက်ရာ နေရာတစ်ခုအဖြစ် ပေါ်ထွန်းလာစေရန် ကိုင်တွယ်ဖြေရှင်းရမည့် လိုအပ်ချက်များကို ဤစာတမ်းတွင် ဆွေးနွေးတင်ပြထားပါသည်။